hindi ako makapaniwala. wala na si tiya dely magpayo.
si tiya dely ang isa sa mga idol ko sa radyo.
simula nung high school ako pinakikinggan ko na yung programa niya sa radyo na "ang mga liham kay tiya dely" at "ang tangi kong pag-ibig." walang humpay ang pakikinig ko sa mga programang iyon sa dzrh pwera lang kung may pasok ako noon. minsan pa nga naisip kong magpadala ng sulat sa kanya pero wala naman akong makukuwentong mabigat na problema o di kaya naman patungkol sa pag-ibig.
hindi ba't bagay na bagay ang pangalan niya sa kanyang ginagawa? kung napakinggan niyo yung "ang mga liham kay tiya dely," alam niyo kung paano magbigay ng payo si tiya dely sa mga letter sender niya---diretsahan at walang takot kahit ang ibig sabihin nun ay pagsasabihan niya yung letter sender. (yun ay kung walang sentido kumon yung tao lang naman). limampu't limang taon na ang programang ito at hanggang sa huli marami pa ring nakikinig at nagpapadala ng sulat.
sa halos pitumpung taon niya sa radyo, marami na siyang natanggap na mga gawad-parangal. ganoon siya kagaling.
dahil sa pakikinig ko sa mga programa ni tiya dely, lalo akong nahasa sa pananagalog ko. nakatulong rin ito nang malaki sa bago kong trabaho ngayon. nagkaroon ako ng pagkakataong mapakinggan ang mga awitin ng ilan sa mga pilipinong mang-aawit tulad nina ric manrique at sylvia la torre. (marami pang iba pero sa ngayon di ko maalala ang mga pangalan nila). at higit sa lahat, lalo ko ring napahalagahan ang ating kultura.
nakalulungkot mang isipin na wala na si tiya dely, siguradong maraming magagandang alaala siyang naiwan sa mga kasamahan niya sa radyo at lalo sa kanyang mga tagapakinig. isa na ako doon.
with apologies to my foreign blogfriends who might be reading this post. i felt i should write this post in filipino in respect to tiya dely magpayo, one of the most respected radio personalities here in the philippines who just passed away due to stroke. TT_TT she's one of the people in the industry i look up to and she has even made a difference in my life, tho she doesn't know it. you can read the news item about her passing here.
